Дали полицијата потфрлила во случајот со Росица, ќе треба да каже Внатрешната контрола при МВР

Јавноста бара одговори кој потфрлил во заштитата на 31-годишната Росица Коцева од Велес, која беше убиена и покрај тоа што претходно имала низа пријави против убиецoт, Илија Стефановски, пред трагедијата. Кога новинарите прашуваа, зошто велешкото или скопското Обвинителство не барале построги мерки за Стефановски, кој не ја почитувал забраната за приближување на Росица, оттаму одговорија дека полицијата не ги известила. Истовремено, Обвинителството за гонење организиран криминал и корупција посочува дека тие не можат да лоцираат директна одговорност кај полициски службеници, бидејќи тоа прво треба да го испита Внатрешан контрола при МВР.„Одделот за внатрешна контрола, криминалистички истраги и професионални стандарди при МВР има надлежност за испитување дали полициските службеници постапувале спротивно на законските прописи во конкретниот случај. Доколку се утврди дека со дејствијата на полициските службеници се исполнети елементи на кривично дело, обвинителството ќе постапи согласно своите надлежности“, велат од Обвинителството за „Скопје1“.Документите покажуваат дека Росица повеќепати пријавувала вознемирување и напади – од вознемирување додека таа шетала куче, преку физички напад во двор на училиште, па сè до испишување навредливи графити со нејзиното име, запалено возило на нејзиниот татко, па дури и експлицитни снимки оставени на влез од продавница.Иако постоеле судски мерки за забрана за приближување, доказен материјал бил доставен до Обвинителството уште во јули годинава дека Стефановски не ги почитувал. Сепак, институциите очигледно не реагирале навреме.Прашањето кое јавноста сега го поставува е – зошто никој не ја спречил трагедијата.

Македонија | пред 2 месеци

Не се одржа првото рочиште за смртоносното прегазување на Југо на пешачка патека, возачот кој немал возачка ќе прави вештачење

Не се одржа првото рочиште за смртоносното прегазување на скопјанецот Југо, на пешачка патека. Според неофицијални информации, адвокатите на возачот Фатон Љ., кој го прегази и избега, ќе правеле нивно вештачење за причините за несреќата и усмртувањето.За тоа време, возачот Фатон останува во притвор. Следното рочиште е закажано за 10 октомври, на кое, ако се одржи, возачот ќе треба да се изјасни дали се чувствува виновен. Доколку признае вина, без да се изведуваат докази, ќе се изрече пресуда. Во спротивно, низ повеќе рочишта ќе се презентира доказниот материјал и ќе се сослушаат сведоците.Основното јавно обвинителство Скопје поднесе обвинение против возачот за тешки кривични дела во сообраќајот.Според обвинението, лицето управувало мотор „Кавасаки“ по пешачката патека на улицата „Јордан Хаџи Константинов – Џинот“, и тоа без да поседува возачка дозвола. Иако моторот се движел со брзина од 35 километри на час, надлежните утврдиле дека тоа е небезбедна брзина за условите – пешачка зона на која не смее да се вози моторно возило.Обвинетиот не успеал да го запре моторот навреме и удрил во 67-годишниот пешак Југослав Николовски. При ударот, повреден бил и сопатникот на моторот. Наместо да им помогне, обвинетиот го оставил моторот и избегал од местото на несреќата.Николовски со тешки повреди бил пренесен на Ургентниот центар, каде подоцна починал. Сопатникот на моторот се здобил со полесни повреди.Обвинетиот се товари за две кривични дела:Тешки дела против безбедноста на луѓето и имотот во сообраќајот, иНеукажување помош на лице повредено во сообраќајна незгода.Обвинителството посочува дека во текот на истрагата се обезбедени доволно докази кои го потврдуваат обвинението.

Македонија | пред 2 месеци

Мицкоски: СДСМ се занимава со некрофилија и лаги, состојбата со пожарите е под контрола

„Јас тоа веќе еднаш го коментирав, дури и да е сето тоа точно тие што го кажуваат, а ништо не е точно, тогаш се поставува вистинското прашање: „Што прават тие за да помогнат во процесот“? Тие не прават ништо. Тие се занимаваат со некрофилија, со конструкции и лаги“, вели претседателот на Владата Христијан Мицкоски одговарајќи на новинарско прашање како ги коментира обвинувањата од страна на опозициската СДСМ за справувањето со пожарите.Премиерот истакна дека за разлика од СДСМ, Владата има јас визија и стратегија како да работи чесно и посветено.„Но тие ќе продолжат бидејќи немаат програма, немаат визија, немаат идеја. Ние имаме јасна програма, јасна стратегија како треба понатаму да работиме чесно, одговорно, посветено. Ќе се бориме и како што кажав многу пати до сега, ќе победиме на крај“, дециден е Мицкоски.Мицкоски нагласи дека под контрола се ставени пожарите во Трубарево и Вардариште.„Што се однесува со состојбата со пожарите, оној во Трубарево и Вардариште се целосно под контрола. Ги добив резултатите од Институтот за јавно здравје, сите параметри се во рамките на дозволеното. Во Дрисла е при крај, денеска завршува затрупувањето со земја на малиот дел кој димеше иако повеќе од 90% уште во понеделникот беше завршена таа активност. Состојбата е под контрола“, порача премиерот Мицкоски.

Македонија | пред 2 месеци

Жена со повреди однесена во Клинички, потоа признала дека била натепана во центарот на Скопје

Секторот за внатрешни работи Скопје информира дека вчера (16 септември 2025) околу 14:00 часот во полиција било пријавено дека во Комплексот клиники „Мајка Тереза“ е донесена 84-годишната Е.Б. од Скопје со телесни повреди.Во разговор со полицијата, жената изјавила дека повредите ги здобила истиот ден околу 10:00 часот пред угостителски објект на подрачјето на Центар, каде била физички нападната од друго женско лице.Од МВР додаваат дека се преземаат мерки за расчистување на случајот и откривање на напаѓачот.

Скопје | пред 2 месеци

Полицаец натепан во Шутка

Секторот за внатрешни работи Скопје соопшти дека ноќеска е приведено едно лице поради напад врз полициски службеник.Инцидентот се случил денеска (17 септември 2025 година) околу 02:40 часот на подрачјето на Шуто Оризари, кога 34-годишниот А.Г.Р. од Скопје физички нападнал полицаец кој извршувал службени дејствија.Напаѓачот веднаш бил лишен од слобода, а од МВР информираат дека по целосно документирање на случајот ќе биде поднесен соодветен поднесок.

Скопје | пред 2 месеци

Ветувања за „туѓа нега“ завршија со измама – тетовчанка останала без пари и без помош

Во Секторот за внатрешни работи Тетово е пријавен случај на измама извршена врз 59-годишна жена од тетовско село.Според информациите од МВР, на 16 септември 2025 година, околу 15:15 часот, жената пријавила дека била доведена во заблуда од лице со иницијали Х.Н. од тетовско и уште едно машко лице. Тие ѝ ветиле дека ќе ѝ помогнат да добие социјална помош – туѓа нега, но за тоа побарале 500 евра.Жената ги подготвила потребните документи и на крајот на 2024 година добила решение со кое нејзиното барање било одбиено. Таа ги известила осомничените, но тие продолжиле да ја убедуваат дека парите ќе ѝ бидат исплатени набргу. По извесно време го прекинале контактот со неа, по што сфатила дека е измамена.Од МВР соопштија дека се преземаат мерки за целосно расчистување на случајот.

Македонија | пред 2 месеци

Несреќа во Шуто Оризари: Договорот за исплата на пари пропаднал, случајот заврши во полиција

Во Секторот за внатрешни работи Скопје е пријавена сообраќајна несреќа која се случила на 1 септември 2025 година на подрачјето на Шуто Оризари.Според информациите од МВР, 20-годишниот Џ.Ш. од Скопје вчера, на 16 септември, околу 13:00 часот пријавил дека со свој електричен тротинет учествувал во судир со патничко возило марка „Мерцедес“. При несреќата тој се здобил со тешки телесни повреди, констатирани во Градската општа болница „Св. Наум Охридски“.Пријавителот изјавил дека со возачот на автомобилот се договориле тој да му исплати пари за лекувањето, но бидејќи тоа не било сторено, настанот го пријавил со задоцнување.Од МВР информираат дека се преземаат мерки за пронаоѓање на возачот на патничкото возило и за целосно расчистување на случајот.

Скопје | пред 2 месеци

Шукова: Загадувањето од греењето мора да се намали имам план за почист воздух во Скопје

Кандидатката за градоначалник на Град Скопје, Каја Шукова, говореше за еден од најгорливите проблеми на главниот град загадувањето на воздухот во сезона на греење.„Убаво е на Видиковец, одовде се гледа цело Скопје. Но, во есен и зима, градот го нема. Се губи под густа магла и сив смог. Тоа не е природна појава, туку слика на едно запуштено, загадено и загушено Скопје. Дали дишеме воздух или отров?“ рече Шукова.Таа потсети дека Скопје е еден од најзагадените градови во светот, а тоа, како што нагласи, не е само статистика, туку сурова реалност што граѓаните ја чувствуваат секој ден во зимските месеци.„Маглата не е само временска појава, туку симбол на четиригодишен институционален неуспех и негрижа на ВМРО-ДПМНЕ, бидејќи општините имаат клучна улога во справувањето со загадувањето,“ истакна таа.Шукова нагласи дека најголемиот дел од загадувањето доаѓа од греењето во домаќинствата со влажни дрва, јаглен и отпадни материјали, додека индустријата веќе започнала со инвестиции во технологии за намалување на емисиите, но потребни се дополнителни вложувања и сериозен мониторинг.„Промена не може да се случи преку ноќ, но не треба граѓаните да се гушат уште 10 години за да ги видат првите резултати. Јас не можам да ви ветам чудо, туку конкретни решенија. Стојам овде пред вас и велам дека имам план,“ додаде Шукова.Во својот план таа најави конкретни мерки:Во првата година забрана за користење на нееколошки горива во подрачја со достапно парно греење, задолжително поврзување на новоизградени станбени згради на системот за централно греење, субвенции за замена на старите системи со еколошки, јавни објекти со еколошки системи за затоплување, засилени инспекции и чистење на градот од отпад. Во првите три години елиминирање на главните извори на загадување, субвенции за енергетска ефикасност за најранливите категории граѓани, модернизација на јавниот превоз и подобрување на велосипедската и пешачката инфраструктура.На долг рок целосна транзиција кон одржлив начин на затоплување во јавните објекти, градска топлинска мрежа со гас и обновливи извори на енергија, зелени коридори за почист воздух и имплементација на BRT-системот.,,Скопје мора да биде град со чист воздух. Ова не е само еколошко прашање овде се работи за здравје и квалитет на живот,“ истакна кандидатката за градоначалник на СДСМ, Каја Шукова.

Скопје | пред 2 месеци

Мицкоски капитулирал пред иредентистичкиот притисок, премиерот кренал раце од Западна Македонија, но не и народот, велат од Левица

„Премиер на држава, од “патриотската“ ДПМНЕ, како папагал повторува дека македонски кандидат не може да победи во Тетово, Гостивар и Струга. Премиере, кога ги избришавте овие градови од мапата на Македонија? Дали со ова им порачувате на Македонците од тие предели дека треба да се иселат, бидејќи според вас немаат никакви шанси?“, велат од Левица и додаваат:Македонија не е партиски или етнички пазар за размена на општини и функции. Тетово, Гостивар и Струга се исто толку Македонија колку и Скопје, Велес или Штип.Особено е скандалозно што токму ДПМНЕ, која се претставува како најпатриотска партија, отворено најавува поддршка за кандидатите на ВРЕДИ – луѓе кои јавно заговараат федерализација и претворање на Македонија во втора албанска држава. Со ова, Мицкоски испраќа јасна порака дека неговата борба за власт е далеку поважна од државните и националните интереси.Уште поскандалозно е што премиер на држава излегува и ги убедува Македонците дека самото кандидирање Македонци за градоначалници во Тетово, Гостивар и Струга било „антимакедонски чин“.Замислете, според Мицкоски, тоа што Левица единствена им понуди на граѓаните кандидати во овие општини е проблем.За каква демократија зборуваме кога премиерот однапред го потценува народот и нервозно го прогласува исходот - дека неговиот коалиционен партнер, во којшто очигледно е страстно заљубен, мора да победи?Жителите на Тетово, Гостивар и Струга заслужуваат избор - луѓе без криминално минато, без мафијашки врски, чесни, со визија и дигнитет. Левица им го нуди токму тоа на сите жители - Македонци, Албанци, Турци и сите останати подеднакво.Мицкоски треба конечно да сфати дека граѓаните не се наивни и не постојат за да му ја потврдат партиската агенда. Македонија не е нивна сопственост и не може да се разменува по тајни договори.Западна Македонија, како и целата држава, заслужува нов почеток со чесни градоначалници и советници кои ќе работат за сите граѓани и конечно ќе понудат развиток, а не уназадување.

Македонија | пред 2 месеци

Тешка исповед на мајката на загинатиот Андреј во „Пулс“: Животот ми остана темница, те изгубив легнат на кревет без изгореници...

Шест месеци по трагичниот настан во Кочани, кога меѓу жртвите беше и нејзиниот син, мајката Марија Петрушева ги сподели своите болни чувства и неизмерната тага во јавна исповед. Во емотивниот текст таа раскажува како секој ден се обидува да ја почувствува присутноста на синот Андреј преку старите пораки и снимки на мобилниот телефон.Нејзината исповед, во целост:„Син на мајка – Андреј. Сине мој, сè уште стоиш во мојот телефон како 'Син на мајка'. Секој ден повторно ги отворам нашите разговори и читам... барам трага од тебе, глас што нема да замолчи. Зборови што ми се како здив, но и како нож. Телефонот ми е во рака, проверувам – дали си ми пишал, дали имам пропуштен повик... секојпат се надевам на чудо. Сеуште ја бирам твојата шифра, почнувам порака – пишувам, пишувам – а одговор нема. Само мртва тишина.Поминаа шест месеци, сине. Шест месеци без тебе, без твојата насмевка, без твоите прегратки. И јас одбивам да прифатам дека никогаш нема да се вратиш. Душата ми е искината на милион парчиња. Секој ден ми е потежок, секој здив ми е потежок. Болката расте, а со неа и празнината.Секогаш се сеќавам на ноќта... Ноќта кога петнаесет минути неизвесност беа мојата најголема светлина. Последната вест што ја слушнав кога ве барав пред ужасот кој го затеков пред дискотеката: „Со амбулантно возило отидоа во болница, Андреј беше со слаб пулс, Кристијан е во свесна состојба, со него е...“ Петнаесет минути надеж. Петнаесет минути вера дека ќе останете живи и двајцата. А потоа... кога влегов и те видов легнат на кревет, без изгореници... не сфатив. Не прифатив. Не можев да поверувам дека е готово, дека те изгубив засекогаш. Само гласот на брат ти одекна до мене: „МАМО, МАМО, НЕ УСПЕА БРАТ МИ, ГО ИЗГУБИВМЕ ЗАСЕКОГАШ!“Тој крик ми ја распарчи душата. Се обидувавме да те анимираме, да те вратиме... Се борев да ја грабнам твојата душа назад, но Господ не ме послуша. Плачев: „Земи ме мене, Господи, остави го него. Тој е млад, тој е мојата иднина, тој е мојот живот!“ Но не... те изгубив, сине. Те изгубив засекогаш.Се враќам на тој ден – 16 март 2025 година – денот кога светот престана да постои за мене. Денот кога ми згасна сонцето. Денот кога ја изгубив мојата сила. Зошто, Андреј? Зошто не успеа? Зошто не можеше да се спасиш? Илјада прашања ми горат во мислите, но одговори нема. Само болка. Само црнина.Животот ми остана темница. Секој здив е како нож. Секој чекор е без смисла. Сине мој, ангеле мој – ми недостигаш повеќе од сè, повеќе од зборови. Те барам во сонот, те очекувам на вратата – да влезеш со насмевка и да ми речеш: „Мамо, тука сум“. Но се будам, и вистината пак ме убива. Ќе продолжам да пишувам пораки што никогаш нема да стигнат. Ќе продолжам да те барам во секоја светлина, во секој здив, во секое срце што чука околу мене. Зашто ти, Андреј мој си и ќе останеш мојата вечна љубов, мојата вечна рана, мојата вечна болка.“

Коментари | пред 2 месеци

Постои опасност од ново разгорување во Трубарево, направен е увид иако и натаму чади

Јавен обвинител од Основното јавно обвинителство Скопје, заедно со увидни екипи на МВР, денеска извршија увид на локацијата во Трубарево каде што изминативе денови избувна голем пожар во складиште за отпад.Како што соопштија од Обвинителството, увидните дејствија се спроведени и во однос на причините за избивање на пожарот и во однос на складирањето на отпадот. На терен било извршено фотографирање и дронско снимање.„Со оглед на затрупувањето на локацијата од безбедносни причини, увидните дејствија се отежнати. По наредба на јавен обвинител, локацијата ќе остане обезбедена и во наредниот период за потребите на постапката“, велат од ОЈО.Дополнително, Министерството за животна средина ќе продолжи со мерења на загадувањето, а на терен ќе излезе и вешто лице од областа на екологијата.На местото и понатаму е стационирана противпожарна екипа, бидејќи се јавуваат повремени чадења и постои опасност од ново разгорување.Обвинителството најави дека, паралелно со увидот, ќе продолжат и другите истражни дејствија за целосно испитување на настанот и одговорноста за него.

Скопје | пред 2 месеци

Сведоштво: Заспиваме со врисоци на една жена, полиција доаѓа секој втор ден, но не делуваат туку држат лекции

По бруталното убиство на Росица во Велес, која беше ликвидирана заедно со својот татко, од нејзиниот поранешен партнер фоторепортерката Арбнора Мемети на социјалните мрежи објави потресно сведоштво за слична ситуација што се случува во нејзиното соседство.„Полицијата кај нас доаѓа речиси секој втор ден. Ова трае веќе една година. Заспиваме со врисоци на една жена и се будиме со нив. Полицајците доаѓаат, им држат лекции дека не треба да користат насилство, па си заминуваат,“ напиша Мемети.Таа откри и дека лично слушнала разговор меѓу полицаец и дежурен командир, во кој службеникот предупредил дека мора да се преземе нешто„Но, една ноќ доцна навечер слушнав еден полицаец како на телефон му се жали на дежурниот командир дека мора нешто да преземат за овој случај, бидејќи во спротивно е јасно дека e прашање на време кога ќе се случи убиство, а тие ќе одговараат затоа што не го евидентирале случајот. И така, доаѓаат и си одат, ќе доаѓаат и ќе си одат сè додека еден ден навистина не се случи тоа. Работата на МВР не е да посредува и да држи морални предавања за тоа како не треба да се тепаат меѓусебно, туку да делува. Од ваквото постојано однесување страдаат човечки животи.

Коментари | пред 2 месеци

Апасиев и Левица од „неподмитливи“ станаа профитери, вистинат излезе, вели Манасиевски

Членот на Централниот комитет на ВМРО-ДПМНЕ, Валентин Манасиевски, жестоко ја нападна партијата Левица и нејзиниот лидер Димитар Апасиев, обвинувајќи ги за лицемерие и профитерство.„Од наводно неподмитливи до профитери, ова е вистинското лице на Апасиев и Левица. Апасиев и Левица, кои се претставуваа како скромни, неподмитливи и народни, денес се демаскирани,“ изјави Манасиевски.Тој ја посочи како скандалозна зделката за купување конфискуван недвижен имот во центарот на Скопје по цена од 250 илјади евра, за која јавноста прво беше убедувана дека не постои. „Вистината излезе на површина – просторот навистина е купен преку директен договор со извршител и банка, иако Левица со години гласно се спротивставуваше на вакви практики,“ додаде тој.Според Манасиевски, со овој чекор Апасиев ја претворил Левица од левичарска и работничка во „елитистичка партија што гази врз сопствените членови“. Тој потсети и дека Левица барала донации од граѓаните, додека парите, како што вели, завршувале кај партискиот врв, а истовремено партијата го практикувала истото што им го замерува на другите – користење привилегии и патни трошоци.„Апасиев и Левица се сè, само не се неподмитливи и скромни. Нивната вистинска агенда е јасна – од наводно неподмитливи до профитери,“ порача Манасиевски.

Македонија | пред 2 месеци

Пукање во Струга: приведени две лица за обид за убиство - еден од нив е малолетник

Две лица од Струга и Велешта се приведени под сомнение за обид за убиство, информираше Министерството за внатрешни работи.Според соопштението, на 16 септември околу 23 часот, полициските службеници од ОВР Струга го лишиле од слобода А.К. (29) од Струга, а следниот ден, на 17 септември околу 11 часот, бил приведен и Л.К. (34) од струшкото село Велешта.Двајцата осомничени претходно, на улица „ЈНА“ во Струга, со метални предмети ги нападнале Б.А. (52) и 17-годишно момче од дебарското село Џепиште. При нападот, Л.К. испукал неколку куршуми од огнено оружје кон постариот маж, по што успеал да избега од местото на настанот.Против осомничените е поднесена постапка за кривично дело „убиство“ во обид, по член 123 став 1 во врска со член 19 од Кривичниот законик.Истражните органи продолжуваат со постапките за целосно расчистување и документирање на случајот.

Македонија | пред 2 месеци

Филипче: Жално е што реформите за ЕУ интеграциите Владата воопшто не ги спроведува

Да го искористиме времето и искуството на другите земји, за да исчекориме напред и да покажеме резултати во преговорите за членство во Европската Унија, порача претседателот на Социјалдемократскиот сојуз на Македонија и претседавач со Националниот совет за евроинтеграции, д-р Венко Филипче.На денешната работилница „Придонесот на Собранието во ЕУ преговорите“, организирана во рамки на проектот „Поддршка на Европската интеграција на Северна Македонија“, Филипче посочи дека Македонија нема друга иднина освен Европа, а Националниот совет за евроинтеграции треба да биде платформа која ќе се надградува со искуства од другите земји.„Треба да учиме од туѓи грешки, од туѓи искуства и на тој начин да покажеме дека имаме некаква визија, имајќи предвид дека сме компатибилни како земји и со Црна Гора и со Албанија, коишто се сега неколку чекори пред нас, поради нивната посветеност, којашто ја покажаа во изминатите повеќе години, потврдувајќи ја визијата каде сакаат да ја видат својата земја во иднина“, рече Филипче.На работилницата, Филипче нагласи дека е потребен политички консензус, особено во спроведувањето на реформите кои произлегуваат од преговарачката рамка.„Барем во делот на спроведувањето на реформите, да покажеме некаков перформанс. Жално е што тоа не се случува во овој момент со доволна динамика, така како што треба да се случува. Се доцни со носењето на приоритетните закони од реформската агенда, пред сè од Министерството за правда. Меѓутоа, има еден добар, позитивен момент, имавме заеднички и надпартиски консензус во критиката на министерот за правда на минатиот состанок, од најголемите политички партии“, рече Филипче.Во однос на постигнувањето политички консензус за обезбедување уставни измени и за отпочнување на преговорите со ЕУ, Филипче потенцираше дека Собранието треба да биде телото во коешто тој процес ќе се одвива.„Нема друга институција во државата во која што треба да седнат сите политички чинители и да го постигнат потребниот консензус. Ако и формалниот дел, самото гласање, и така натаму, се одвива во Собранието, нема потреба да бараме други форми“, рече Филипче.Денешната работилница има за цел да ги зајакне капацитетите на Собранието во процесот на Европските интеграции, преку унапредување на неговата улога во вршењето на демократски надзор, поттикнување на инклузивност и градење на политички и општествен консензус околу реформите поврзани со ЕУ. Целта на проектот во рамки на работилницата, кој се имплементира од Канцеларијата на Обединетите нации за услуги на проекти (UNOPS), е да ја зајакне институционалната подготвеност и капацитетите на Северна Македонија за водење ефективни пристапни преговори и успешно управување со процесот на интеграција во Европската Унија.

Свет | пред 2 месеци

Издадено предупредување: Русите ја гранатираа најголемата нуклеарна централа во Европа, се крева црн чад

Меѓународната агенција за атомска енергија (МААЕ) објави ново гранатирање во близина на нуклеарната централа Запорожје, најголемиот таков објект во Европа под руска окупација, пишува The Kiev Independent.„Она што некогаш беше практично незамисливо – гранатирање или други воени активности што се одвиваат во близина на големи нуклеарни инсталации – стана редовна појава за време на оваа ужасна војна“, рече генералниот директор на МААЕ, Рафаел Гроси.Набљудувачите на МААЕ на терен забележаа „црн чад што се издига од три блиски локации“ по гранатирањето. Раководството на централата, формирано од Русија, ѝ соопшти на агенцијата дека артилериските гранати паднале приближно 400 метри од складиштето за дизел гориво што се наоѓа надвор од самата централа.Агенцијата не ја припиша одговорноста на ниедна страна, иако Москва ја обвини Украина за нападот.Нуклеарната централа Запорожје, која се наоѓа во окупираниот град Енергодар, произведуваше околу 20% од електричната енергија на Украина пред руската инвазија. Руските сили го зазедоа во март 2022 година.МААЕ со месеци предупредува за сериозните ризици од нуклеарна несреќа, велејќи дека Русија ја користи централата за да изврши притисок врз Украина и нејзините меѓународни партнери. Според извештаите, московските сили стационирале војници и опрема во објектот и редовно ја гранатирале околната област.Русија тврди дека централата е дел од нејзината нелегална анексија на регионот Запорожје и, според извештаите, гради нови далноводи за да ја поврзе со сопствената електрична мрежа.Дипломатски напориСоединетите Американски Држави, според извештаите, предложиле план за враќање на контролата врз централата на Украина, пред да го предадат управувањето на Соединетите Американски Држави. Целта била да се обезбеди снабдување со електрична енергија и за руската и за украинската област.Москва првично го отфрли предлогот, иако рускиот претседател Владимир Путин подоцна изјави дека е „отворен“ за соработка со Украина и САД во врска со електраната.

Свет | пред 2 месеци

Пронајден исчезнатиот Ѓорѓе, по кого се трагаше од неделата

Пронајден е 83-годишниот Ѓорѓе Серафимовски од тетовското село Фалипе, потврдија од семејството за „Скопје1“. Тој е контактибилен и е во болница на дополнителни проверки.Засега нема дополнителни информации за неговата здравствена состојба. Серафимовски беше исчезнат од неделата, а по него се трагаше три дена.Семејството упати благодарност до сите кои помогнале во потрагата.

Македонија | пред 2 месеци

„Ќе бидеш моја или ќе бидеш мртва“ – последното сведоштво на Росица за убиецот Илија, шест дена пред да биде убиена

За закани, киднапирање и тепање кои се случиле последните денови од 2024 година, сега убиената Росица Коцева, била повикана во Обвинителство пет дена пред да биде убиена, за да даде исказ. И таму кажала, дека убиецот Илија Стефановски, и се заканувал со зборовите „ќе бидеш моја или ќе бидеш мртва“. Сепак, Обвинителството не побарало притвор или построги мерки за обезбедување присуство, освен веќе изречената забрана за приближување, која не била испочитувана, а обвинител од Велес бил запознаен за ова уште во мај годинава.Ова е целиот исказ на Росица Коцева, даден пред Обвинителството:„Јас и сегапријавениот Илија бевме во вонбрачна заедница скоро три години, но од октомври месец 2024 година таквата заедница прекина и јас се вратив повторно да живеам во Велес, сепак декември месец 2024 година и покрај тоа што бевме разделени со пријавениот имавме повремена комуникација, па така истиот на 27.12.2024 година ме повика заедно со него да одиме до Софија, Република Бугарија, со оглед дека на истиот му беше потребна помош, а со оглед дека јас добро го владеам бугарскиот јазик, прифатив заедно да појдам со него и да му помогнам во неговите обврски. По завршување на обврските во Софија на враќање кон Скопје во еден момент настана кавга помеѓу нас, бидејќи пријавениот сакаше повторно да ја обновиме нашата врска, но од моја страна имаше негодување од таквото негово барање, при што во еден момент ми доба и ми се закани со зборовите „ќе бидеш моја или ќе бидеш мртва“.По ова продолживме на пат кон Скопје и притоа додека си идевме истиот побара од мене да ја поминам ноќта кај негео во Скопје, на што од моја страна му беше одговорено дека би останала само доколку истиот ја повика неговата мајка или пак доколку таа не може да одиме во мојот дом во Велес, и да преспиеме кај мојот татко, сепак, веднаш штом пристигнавме во Скопје, поточно во Ѓорче Петров каде што илија живее, истиот ја повика неговата мајка, но и во истиот момент почна со малтретирање кон мене, при што истиот ме удираше по целото тело, ме закличи во неговиот дом, но не можам да се сетам колку време бев затворена, со оглед да немав ни телефон со мене, ни саат за да можам да се ориентирам колку време сум затворена. Исто така тој почна насилно да се однесува и кон својата мајка, така што физички ја отргнуваше, а од моја страна истата беше молена да повика полциија, но и нејзиниот телефон беше одземен од негова страна, така што истата беше спречена да повика помош.Следниот ден некаде после  пладне, по краток разговор со Илија дека доколку ме пушти дека ќе одиме, ќе побараме помош за да ни успее врската, по што исиот се сложи да ме пушти. Со оглед дека бев истрауматизирана од ваквиот настан, истиот од моја страна по два три дена беше пријавен најпрво во ПС Ѓорче Петров, а оттаму бев препратена и до ПС Кисела Вода, каде го пријавив конкретниот настан, а исто така со оглед на траумите и повредите кои ги имав, по неколку дена од настанот се јавив и на Ургентен центар во Велес“.Обвинителството не гледа вина во своето постапување. Росица беше убиена во Велес, заедно со нејзиниот татко.

Македонија | пред 2 месеци

Мицкоски и Тошкоски ставени на фото со крвави лица, Томовски: „Креаторите на сликата нудат црнила и лаги, СДС ќе изгуби многу“

Директорот на СОЗР, Ивица Томовски, оцени дека СДС ќе изгуби многу на претстојните избори, обвинувајќи дека опозицијата нуди „црнила и лаги“-Еден пријател ме праша колку ќе загуби СДС, реков многу. Причините за тоа е фотографијата подолу. Затоа што додека Мицкоски прави проекти, Венко нуди пожари, додека Владата се бори за развој и правда, креаторите на сликата подолу нудат црнила и лаги. И тоа е еден ист центар. Тој центар е против Македонија и се она за што се бориме. Затоа ова е за осуда. А пресудата на народот доаѓа многу бргу.

Македонија | пред 2 месеци

Нови ужаси во Газа, израел бомбардираше детска болница! „Пукаат во се што се движи“

Израелските сили преку ноќ ја нападнале детската болница Ал-Рантиси во Појасот Газа, што доведе до евакуација на околу 40 хоспитализирани пациенти, соопштија од канцеларијата за медиуми на владата на Хамас. Комплексот бил цел на три одделни напади за краток временски период.„Овој злостор го потврдува систематското настојување на окупаторот да го блокира здравствениот систем“, стои во соопштението.Ал-Рантиси е единствената специјализирана болница во Газа која обезбедува онкологија, дијализа и други специфични услуги, вклучувајќи третман на пациенти со респираторни и дигестивни заболувања. Според властите, таму се згрижени 80 пациенти, како и четири интензивни единици за возрасни и осум неонатални оддели со интензивна нега.Градот Газа е претворен во сцена на апокалипса. Додека израелската армија ги проширува своите копнени операции, министерот за одбрана Израел Кац отворено се закани дека ќе го уништи градот до темел. Она што некогаш претставуваше срце на палестинската енклава денес изгледа како море од урнатини, чад и крици на луѓе заробени под бетонските блокови.More than 200,000 Palestinians displaced from Gaza City amid escalating Israeli air strikes and humanitarian crises in besieged areas — in pictures https://t.co/uH1p22Ln61 pic.twitter.com/PMcmVIBHs8— Al Jazeera English (@AJEnglish) September 11, 2025 Иако армијата објави дека отворила привремена рута за евакуација преку улицата Салах ал-Дин, жителите тврдат дека станува збор за измама.„Никој не може да мине. Се пука во сè што се движи“, велат очајни жители. „Гранатирањето е постојано, а опасноста расте од час во час.“Стотици илјади луѓе се принудно раселени од градот Газа додека Израел ја продолжува офанзивата што поголемиот дел од светот ја осудува како геноцидна. Фотографии од патиштата кон југ ја отсликуваат голготата на Палестинците и страдањето што им се наметнува од Израел и неговите сојузници.Нападите врз станбени објекти, училишта и болници не запираат. Според болнички извори за „Ал Џезира“, утрово во Појасот Газа загинале најмалку 12 лица, од кои седум во градот Газа.

Свет | пред 2 месеци

(Видео) Убиецот на Чарли Кирк се појави во суд, обвинителите ќе бараат смртна казна

Човекот обвинет за убиството на Чарли Кирк признал дека го убил десничарскиот активист во порака до својот цимер, објавија обвинителите, додека ги претставуваа седумте обвиненија против него.Тајлер Робинсон, 22, оставил порака под тастатурата за неговиот цимер, изјави обвинителот на округот Јута, Џефри Греј. Тој додаде дека цимерот бил романтичен партнер на обвинетиот.Според Греј, во пораката пишувало: „Имав можност да го убијам Чарли Кирк и ќе ја искористам“.https://youtu.be/pQ4gYqoRfq8Обвинителот, исто така, споделил текстуални пораки меѓу цимерите, вклучувајќи една во која обвинетиот наводно рекол дека го застрелал Кирк затоа што „му било премногу од неговата омраза“.Осомничениот е задржан без кауција во специјална станбена единица во затворот во округот Јута. Тој првпат се појави пред судот, појавувајќи се од далечина додека обвинителите ги читаа седумте обвиненија против него.Обвиненијата се тешко убиство, кривично дело пукање со огнено оружје, две точки за попречување на правдата, две точки за манипулирање со сведоци и извршување на насилно кривично дело во присуство на деца.Тие исто така рекоа дека ќе бараат смртна казна за пукањето во Кирк, кој беше убиен со еден истрел испукан од покрив додека зборуваше на Универзитетот Јута Вали во среда.Уапсен минатата недела по 33-часовна потера, обвинетиот не се изјасни ниту призна пред полицијата. Обвинителот, исто така, нагласи дека обвинетиот е невин додека не се докаже дека е виновен и ќе се соочи со судење од порота.Тој откри мноштво докази на прес-конференција во вторник, вклучувајќи го наводното признание на обвинетиот и ДНК пронајдена на чкрапалото на пушката за која се сомнева дека е употребена во злосторството.

Свет | пред 2 месеци

Исчезнат 83-годишен жител на тетовско Фалише, семејството моли за помош

Семејството трага по 83-годишниот Ѓорѓе Серафимовски од село Фалипе, кој во неделата утрината околу 10 часот излегол од својот дом со намера да оди кон Тетово и оттогаш не е пронајден.Според пријавата, Серафимовски бил облечен со блуза со крагна и со пруги, сини кратки панталони и шапка со крем боја.Семејството апелира дека доколку некој го забележи, веднаш да се јави во полиција на бројот 192, на бројот за итни случаи 112 или директно кај нив на телефонскиот број 077/939-884.

Македонија | пред 2 месеци

Продолжен притворот за четворицата осомничени во истрагата за Трубарево

Кривичниот суд им го продолжи краткотрајниот притвор за нови 48 часа на четворицата сопственици и управители на фабриката за електронски отпад во скопско Трубарево, по предлог на Основното јавно обвинителство (ОЈО) Скопје.Четворицата беа приведени и во неделата вечерта спроведени пред судија на претходна постапка, по што судот им одреди првичен 48-часовен притвор.Според Обвинителството, станува збор за 56-годишен управител и сопственик на две правни лица, 22-годишна управителка на трето правно лице, 42-годишник во својство на раководител на подружница и 59-годишник вработен во правно лице.Од ОЈО Скопје информираат дека денеска ќе започне увид на лице место за причините за пожарот, а увидните екипи на терен ќе ги координира јавен обвинител.

Скопје | пред 2 месеци

Статус на еден татко: „Татковците да ги научат синовите - жената не е трофеј, љубомората е болест, и „не“ навистина значи „не“!

Андреа Јанков, кандидат за советник во Град Скопје од „Левица“, за последниот фемицид во Велес, за убиството на Росица Коцева, со статус на Фејсбук проговори како татко – со апел до родителите да ги научат синовите дека жената не е трофеј, љубовта не е поседување, а „не“ навистина значи „не“.-Како татко на син, знам дека татковството носи со себе огромна одговорност, не е мое само да го нахранам, облечам и испратам на училиште, туку пред се да му покажам што значи да се биде човек и маж.Фемицидот кој се случи во Велес, покрај неспособноста на институциите, е последица и на невоспитаноста на деца кои подоцна растат во емоционално нестабилни луѓе, кои не разбираат што се граници, и кои не сфаќаат кога „не“ навистина значи „не“.Ние, татковците и мајките, сме првите што мора да ги научиме синовите:-дека жената не е трофеј или предмет-дека љубовта не е поседување-дека посесивноста и љубомората се форми на болест, а не љубов-дека достоинството на друг човек не смее да се гази заради моментална страст-дека не постои оправданост за насилно однесување во случај на одбивањеМора да ги научиме дека да сакаш некоја личност значи да ја оставиш слободна, а не да ја врзеш со синџири од љубомора.Јас го учам мојот син дека силата на мажот не е само во мускулите, туку во способноста да ја контролира својата агресија. Дека успехот и големината на мажот не се мери со бројот на девојки кои ќе ги има, туку со почитта што ќе ја добие од луѓето околу него.Затоа родители, разговарајте со вашите синови за љубовта, за границите, за почитта. Подобро е навидум непријатен разговор дома, отколку трагедија надвор.За подобра иднина, да се погрижиме децата да не ни бидат слепи слуги на своите нагони, туку емпатични битија кај кои императив во однесувањето ќе им биде благосостојбата на другите.

Коментари | пред 2 месеци

Ташки метали присутни само на едно испитно место во Трубарево, ИЈЗ ги соопшти резултатите

Институтот за јавно здравје утврди присуство на тешки метали во почвата на едно место, зголемени вредности на бакар и цинк во површинскиот слој каде што гореле литиумски батерии — додека на сите други локации не се констатирани отстапувања од референтните вредности.Истовремено, не е детектирана радиоактивност во воздух, почва и вода, а во водата не е утврдено присуство на тешки метали, соопшти Институтот за јавно здравје (ИЈЗ).ИЈЗ изврши вонредно испитување во засегнатото подрачје и во неделата (14.09.25) беа земени примероци/мостри од страна на професионален експертски тим од ИЈЗ за испитување на радиоактивност во вода, почва и воздух, како и примероци за испитување на тешки метали во почва (земја) и испитување на тешки метали во вода.ИЈЗ извести дека, според резултатите и направените анализи, во земените примероци не е утврдено присуство на радиоактивност во воздух и почва, како и дека не е утврдено присуство на тешки метали во вода.Институтот вчера ги завршил анализите и испитувањата на примероците за испитување на тешки метали во почва, како и испитувањата за радиоактивност во вода. Земени се мостри од повеќе локации од засегнатото подрачје за испитување на тешки метали во почва, и тоа: олово, кадмиум, арсен, никел, жива, хром, бакар, цинк, калај, бариум, берилиум, кобалт, ванадиум, талиум, молибден и антимон.По анализата на резултатите од сите земени примероци, може да се заклучи дека нема отстапување од референтните вредности за сите испитани 16 тешки метали.Институтот за јавно здравје во најкус можен рок ги направи потребните анализи. Истите ќе бидат повторени согласно протоколите, во времето предвидено за тоа. ИЈЗ останува во понатамошна координација со Министерството за здравство и со сите надлежни државни институции, а за секоја наредна активност јавноста ќе биде соодветно информирана.

Скопје | пред 2 месеци